Bumaba ng 39 porsiyento ang mga insidente ng voyeurism o pamboboso sa unang apat na buwan ng 2025.
Kinumpirma ni Police Brigadier General Bernard Yang, Philippine National Police Anti-Cybercrime Group (PNP ACG) Acting Director, na ang 86 na insidente ng voyeurism na naitala mula Enero 1 hanggang Mayo 1 ay mas mababa kaysa sa 141 na naitala sa parehong panahon noong nakaraang taon.
Ang pagbaba ng insidente ay resulta ng kanilang patuloy na mga hakbangin na magpalaganap ng pampublikong kamalayan sa pamamagitan ng mga diyalogo, seminar, at social media campaigns upang tuluyang puksain ang mga cybercrimes.
Mula Enero hanggang Marso 2025, ang PNP ACG ay nagsagawa ng kabuuang 360 police operations, kabilang ang 193 entrapment operations at 131 service of warrants of arrest, na humantong sa pagkakaaresto sa 369 na indibidwal na sangkot sa iba’t ibang cybercrimes.
“Ang mga pagsisikap na ito ay nakatulong sa pagbaba ng mga cybercrimes, lalo na sa photo at video voyeurism, dahil mas maraming tao ang nakakaalam ng mga panganib ng tahasang pababahagi ng mga contents online,” sabi ni PBGen Yang.
Dagdag pa niya, ang pagtaas ng kanilang operational accomplishments ay nauugnay sa pinaigting na cyber patrolling, social media investigation, and surveillance na nakatuon sa pagsubaybay sa mga indibidwal na sangkot sa mga ilegal na gawain online gaya ng pagbebenta ng mga nakarehistrong SIM card, financial accounts, at mga ipinagbabawal na device tulad ng mga International Mobile Subscriber Identity (IMSI) catchers at text blast machines.
Patuloy na hinihimok ang publiko, lalo na ang mga kabataang pinaka-vulnerable sa photo at video voyeurism, na maging maingat sa pag-post ng contents online, at iulat ang anumang kahina-hinalang mga gawain online upang mabigyan ng tiyak at naaangkop na aksyon.
