Tuguegarao City, Cagayan – Inilunsad ng Valley Cops katuwang ang iba’t ibang sektor ang Revitalized KASIMBAYANAN (KApulisan, SIMbahan at PamaYANAN) nito lamang Martes, Setyembre 20, 2022 sa Camp Marcelo A Adduru, Tuguegarao City, Cagayan.
Sinuportahan at dinaluhan ang aktibidad ng mga lider ng iba’t ibang Religious Sector, Advocacy Support Groups, Force Multipliers, at mga Local Chief Executives.
Ang KASIMBAYANAN ay isa sa programa ng Pambansang Pulisya na naglalayong palakasin ang ugnayan at pagkakaisa ng Kapulisan, Simbahan, at Pamayanan na siyang susi upang malabanan ang kriminalidad, insurhensya, at terorismo at mapanatili ang kaayusan at katahimikan sa pamayanan.
Pinangunahan ni Police Brigadier General Steve B Ludan ang Ceremonial Signing ng Pledge of Commitment na sinundan ng pamamahagi ng KASIMBAYANAN pin sa mga dumalo.
Panauhing pandangal sa nasabing aktibidad si Director Jonathan Paul M Leusen, Regional Director ng Department of the Interior and Local Government Region 2.
Sa kanyang mensahe, pinuri niya ang pagsisikap ng Valley Cops na pagtibayin ang relasyon ng PNP at iba’t ibang sektor ng komunidad. “We continue supporting each other, rebuilding our communities and making a great nation”, ani Director Leusen.
Sinundan ang programa ng KASIMBAYANAN Forum kung saan ibinahagi ni Pastor Bernardo Bundoc, Provincial Coordinator ng My Brother’s Keeper Life Coaches (MBK-LC) ang milestone ng KASIMBAYANAN.
Ipinaliwanag din ni Police Major Sharon C Mallillin, Chief ng Police Information Section, Regional Community Affairs and Development Division ang MKK=K Strategic Priorities.
Samantala, pinasalamatan naman ni PBGen Ludan ang lahat ng dumalo at nakiisa sa naganap na programa. Hinimok din niya ang lahat na makiisa at makipagtulungan sa programang ito ng Pambansang Pulisya para sa isang progresibo at tahimik na Lambak ng Cagayan.
Source: PRO2 Public Information Office
Panulat ni Police Staff Sergeant Mary Joy D Reyes
