Timbog ang isang karpintero matapos makuhanan ng hinihinalang shabu at hindi dokumentadong baril sa Purok Matanog, Barangay Bagua 1, Cotabato City bandang 5:00 ng hapon ika- 20 ng Oktubre 2024.
Sa pamumuno ni Police Lieutenant Kenneth Van A Encabo, Officer-In-Charge ng STACOM, sa pinagsanib pwersa ng mga tauhan ng SDET, Police Station 4-CCPO, CPDEU-CCPO, Intel-PMFC Cotabato at PDEA – BARMM naging matagumpay ang ikinasang anti-illegal drug buy-bust operation na nagresulta sa pagkakakumpiska ng mga ebidensya at pagkakaaresto ng suspek na si alyas “Bhe”, 44 anyos, residente ng naturang lugar.
Nakuha mula sa naturang operasyon ang isang .38 revolver, limang bala, dalawang piraso ng heat-sealed transparent plastic sachet na naglalaman ng hinihinalang shabu na nagkakahalaga ng Php2,100 at isang Php1,000 bill.
Kasong paglabag sa Republic Act 10591 o “Comprehensive Firearms and Ammunition Regulation Act” at RA 9165 o “Comprehensive Dangerous Drugs Act of 2002” ang kakaharapin ng naarestong suspek.
Sa patuloy na koordinasyon ng bawat sangay ng gobyerno ay masasawata at mapipigilan ang anumang uri ng kriminalidad partikular ang ilegal na droga at loose firearms na hangarin ng PNP na mapanatili ang maayos at tahimik na pamayanan.
Panulat ni Patrolwoman Veronica Laggui
