Tubaran, Lanao del Sur – Inilagay ng Philippine National Police (PNP) sa full alert status ang buong munisipalidad ng Tubaran sa Lanao del Sur bilang bahagi ng security measures para sa pagsasagawa ng Special Elections sa 12 barangay nito lamang Martes, Mayo 24, 2022.
Ayon kay PMGen Valeriano De Leon, Director for Operations and Deputy Commander, STF National and Local Elections 2022, na ang aksyon ay naglalayong pigilan ang sinumang armadong grupo o indibidwal na tangkaing sabotahin o impluwensyahan ang mga resulta ng espesyal na halalan para sa higit sa 8,000 mga botante na hindi nakaboto noong Mayo 9 dahil sa banta sa kanilang seguridad.
Dagdag pa ni PMGen De Leon, ayon na sa kanilang pagbabantay ay may mga nakitang armadong kalalakihan sa ilang lugar, ngunit tiniyak naman na hindi mabibigyan ng kahit isang pagkakataon ang mga armadong lalaki na ito para maisakatuparan ang kanilang mga karumal-dumal na plano.
“Mayroon tayong sapat na tropa dito sa Tubaran, na pinalakas ng ating mga kasama mula sa Armed Forces of the Philippines,” ani PMGen De Leon.
Ang mga armadong lalaki ay pinaniniwalaang mga tagasuporta ng mga kandidato sa pagka-alkalde, at sinabi ni PMGen De Leon na kanilang binabantayan ang mga grupong ito, lalo na pagkatapos ng pagsabog ilang araw bago ang espesyal na halalan.
Ayon kay PLtGen Vicente Danao Jr. Officer-in-Charge, Philippine National Police ay hindi bababa sa 600 pulis at 400 sundalo ang ipinadala sa Tubaran.
Ipinahayag ni PMGen De Leon na ang lahat ng mga pulis at sundalo ay nakatalaga sa mga estratehikong lokasyon upang maiwasan ang pagpasok ng mga armadong grupo sa mga itinalagang presinto ng pagboto at hindi bababa sa 52 na mga pulis kada presinto ang nagsisilbing Board of Election Inspectors.
Noong Lunes, Mayo 23, nakipagpulong si PMGen De Leon kay LtGen Alfredo Rosario, Commanding General, Western Mindanao Command ng AFP; MGen Generoso Ponio, Commander, 1st Infantry Division; at PLtGen Jose Chiquito Malayo, Commander, Area Police Command-Western Mindanao, para talakayin ang seguridad at deployment sa lugar.
As of 4 PM noong Mayo 23, 718 na miyembro ng PNP ang ipinadala sa lugar. Kabilang dito ang 171 miyembro ng elite Special Action Force (SAF), 96 na miyembro ng Civil Disturbance and Management mula sa Lanao del Sur Police Provincial Mobile Forces, 252 miyembro ng PRO-BAR Regional Mobile Forces Battalion, at ang iba ay mula sa lokal na puwersa ng pulisya.
Ipinahayag din ni PMGen De Leon na ang Bureau of Fire Protection, kasama ang kanilang mga firetruck at tauhan, at ang Bureau of Jail Management and Penology (BJMP), kasama ang kanilang mga transport vehicle, ay sumapi upang palakasin ang deployment sa bayan ng Tubaran.
“Ang security coverage natin dito, in collaboration with the AFP, the BFP, the BJMP, and the COMELEC, is thorough and extensive, so we are confident in the peaceful and credible conduct of the special election today”, dagdag pa ni PMGen De Leon.
###
Panulat ni Patrolman Mark Vincent Valencia
