Agad na nagsagawa ng search and rescue operations at road clearing ang mga kapulisan ng Police Regional Office Cordillera (PROCOR) sa ilalim ng pangangasiwa ni PBGen Ronald Lee, Regional Director sa mga lugar at mamamayan na lubos na naapektuhan ng pagsalanta ng bagyong “Maring”.
Sa munisipalidad ng Buguias, isang (1) indibidwal ang agad na nirespondehan ng Buguias Municipal Police Station kung saan ang kanyang bahay ay natabunan ng gumuhong lupa sa Lutheran, Abatan, Buguias, Benguet.
Samantala, sa lungsod naman ng Baguio ay matagumpay ang isinagawang search and retrieval operation ng mga kapulisan mula kahapon upang mahanap ang mga labi ng tatlong (3) indibidwal na natabunan ang bahay sa Dominican-Mirador Hill, Baguio City.
Kasama nila sa naturang operasyon ang iba pang ahensiya ng pamahalaan at mga nagboluntaryo mula sa mga pribado at pampublikong organisasyon.
Bukod pa dito, patuloy rin ang pagsasagawa ng mga kapulisan ng water level monitoring, disaster response, at road clearing operations sa mga lugar na kanilang nasasakupan upang siguraduhin ang kaligtasan ng bawat mamamayan.
#####
Article by Police Corporal Melody L Pineda
