Matagal ng kaugalian ng mga Pilipino na tuwing sasapit ang Nobyembre 1 at 2 ay ipinagdiriwang nila ang Kapiyestahan ng mga Patay o Undas na kung saan ay inaalala nila ang kanilang mga namayapang mahal sa buhay.
Sa okasyong ito, halos lahat ng ating mga kababayan ay nagsisiuwian sa kani-kanilang probinsya upang makadalaw sa mga puntod ng mga namayapa nilang kapamilya at kamag-anak.
Subalit, dahil sa krisis na ating nararanasan dulot ng sunod-sunod na kalamidad at pandemya, karamihan sa ating mga kababayan ay suliranin ang pambili ng kandila. Ang mahalaga ay ang madalaw nila ang puntod ng kanilang mga mahal sa buhay.
Kaya naman, ang himpilan ng 1st Northern Samar Provincial Mobile Force Company (1st NSPMFC), sa pamumuno ni PLtCol Edwin Oloan Jr., kasama ang kanyang mga tauhan, ay agad na nag-ambagan upang makabili ng mga bulaklak at kandila na siyang ipinamahagi nila sa ating mga kababayan. Kahit papaano ay naging espesyal ang kanilang pagdalaw at pagdaraos ng Undas.
Marami sa ating mga kababayan ang natuwa at naantig ang damdamin dahil sa naturang ginawa ng ating mga kapulisan. Mayroong iba na tinanggihan ang alok na kandila at bulaklak dahil wala raw silang pambayad ngunit kalauna’y tinanggap na rin ang naturang handog ng kapulisan nang mapag-alamang ito ay bigay lamang ng huli. Lubos ang pasasalamat nila sa kanilang natanggap.
“Isinagawa namin itong aktibidad upang ipakita sa ating mga kababayan na ang ating kapulisan ay tumatalima hindi lamang sa pagpapatupad ng batas para sa kapayapaan at kaayusan ng ating bayan kundi pati na rin ang paggunita ng iba’t ibang okasyong ipinagdiriwang ng mga Pilipino katulad ng Araw ng mga Santo at Araw ng mga Kaluluwa/Patay,” saad ni PLtCol Oloan Jr.
“Sa pinagsamang pwersa ng kapulisan at aktibong mga sektor ng pamayanan, ang mga krimen ay ating maiiwasan. Alinsunod ito sa “Malasakit” na programa ng ating CPNP na MKK=K, Life is Beatiful, Kaligtasan Nyo, Sagot Ko, Kaya Tulong-Tulong tayo,” dagdag pa ni PLtCol Oloan.
