Davao City – Isang kabaong ang pinagtulungang buhatin ng Revitalized-Pulis sa Barangay upang maihatid sa huling hantungan sa Purok 3, Barangay Sumimao, Paquibato District, Davao City, nito lamang Miyerkules, Abril 20, 2022.
Gamit ang matibay na lubid na ikinabit sa isang pirasong kawayan ay pinagtulungang buhatin ng mga tauhan ng R-PSB Team Paquibato at mga kamag-anak ang labi ni Renelo Bitoon upang maayos ito na mailibing.
Sa pangunguna ni Patrolman Bryan Dela Peña at sa pangangasiwa ni PLt Jobert Mancera, Team Leader, sila ay hindi nag-atubiling tulungan ang pamilya Bitoon sa pagpasan ng kabaong nito mula sa kanilang bahay patungo sa sementeryong paglalagakan ng mga labi nito sa kabila ng maputik na daan dahil sa sunod-sunod na pag-ulan.
Ito ay bilang pakikiramay ng R-PSB sa pamilya ng namatayan at upang maayos na maihatid ang bangkay sa kanyang himlayan na taos-pusong ipinagpasalamat ng pamilya Bitoon.
Ang bawat R-PSB ay patuloy at hinding-hindi magsasawang tumulong lalong lalo na sa mga residenteng kabilang sa Geographically Isolated and Disadvantaged Areas (GIDAs) na lubos na nangangailangan ng tulong.
###
Panulat ni Patrolwoman Rose Ann M Delmita
