Pinaniniwalaang illegal drugs equipment ang nadiskubre ng mga awtoridad sa isang warehouse sa bahagi ng Sitio Sagel, Barangay Pinol, Maitum, Sarangani Province nito lamang umaga ng Linggo, Agosto 4, 2024.
Sa ulat ng Sarangani PNP, dakong 8:30 ng umaga nang ni-raid ang naturang warehouse sa bisa ng search warrant na pinangunahan ni Police Colonel Deanry R. Francisco, Provincial Director ng Sarangani Police Provincial Office, kasama ang mga tauhan ng Maitum MPS, PIU, PDEU, PDEG, 2nd PMFC, 38th IB PA at PDEA 12.
Ang bodega ay matatagpuan sa loob ng isang kampo na inaangkin ng MNLF at tumambad sa mga awtoridad ang mga pinaniniwalaang illegal drugs equipment na ginagamit para makagawa ng bultuhang ilegal na droga.
Samantala, sasampahan ng kasong sa paglabag sa Section 26, in relation to Section 8 ng Article II of RA 9165 o ang Comprehensive Dangerous Drugs Act of 2002 ang isang Chinese national na nakitang bumisita sa nasabing warehouse na kasalukuyan ding naniniirahan sa General Santos City.
Patuloy ang PNP sa pagsugpo sa ilegal na droga at iba pang mga krimen upang matiyak ang ligtas na komunidad.
