Timbog ng Naguilian PNP ang isang indibidwal sa kasong pagtutulak ng ilegal na baril at droga matapos itong makorner ng mga awtoridad sa isinagawang Hot Pursuit Operation sa Barangay Palattao, Naguilian, Isabela, matapos ang mabilis na pagtugon sa isang ulat ng ilegal na aktibidad mula sa isang concerned citizen dakong 4:20 ng hapon noong ika- 31 ng Agosto 2024.
Nakatanggap ng tawag ang Naguilian PNP na ang suspek na kinilalang si alyas “Paulo” ay nagtatangkang magbenta ng caliber .38 revolver sa nasabing lugar kung saan kaagad namang naglatag ng checkpoint ang mga tauhan ng Naguilian Police Station, katuwang ang PIU-IPPO at PIT, Isabela, sa National Highway ng Barangay Palattao.
Nakuha mula sa pag-iingat at kontrol ng suspek ang isang (1) caliber .38 revolver na may apat (4) na bala at nang tanungin ang suspek ng karampatang dokumento ng baril ay wala itong maipakita kung kaya’t naging dahilan ito ng kanyang pagkakaaresto.
Narekober din mula sa suspek ang isang (1) Infinix cellular phone, Php21,244.00 cash money at apat (4) na sachet ng puting crystalline substance na hinihinalang shabu.
Ang matagumpay na operasyon ay nagpapakita ng dedikasyon at pagsisikap ng mga otoridad sa pagpapanatili ng kaayusan at seguridad sa ating lipunan para sa maayos at mapayapang pamayanan tungo sa pag-unlad ng ating ekonomiya.
Source: PNP Isabela
Panulat ni Pat Jerilyn Colic
