Walang takas ang isang indibidwal sa isinagawang drug buy-bust operation ng Iloilo City Police Station 6 sa Barangay Sooc, Arevalo, Iloilo City nito lamang ika-3 ng Enero 2025.
Kinilala ni Police Captain Benjie Q Dicen, Officer-In-charge ng ICPS6 ang suspek na si alyas “Naldo,” 32 taong gulang, walang asawa at residente ng Project 3, Barangay So-oc, Arevalo, Iloilo City.
Narekober mula sa suspek ang limang heat-sealed na transparent plastic sachets na pinaniniwalaang shabu, isang Php100 bill na may serial no. WH199375, at iba pang mga non-drug items.
Ang nakuha mula sa suspek ay humigit kumulang dalawang gramo ng suspected shabu na may tinatayang market value na Php13,600.
Mahaharap ang suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Patuloy ang pagsisikap ng Iloilo City PNP sa paghuli sa mga ganitong uri ng krimen upang masugpo ang paglaganap ng ilegal na droga na siyang dahilan sa pagkasira ng kinabukasan at paglaganap ng krimen sa komunidad tungo sa mas ligtas na Bagong Pilipinas.
Source: K5 News Iloilo
Panulat ni Pat Juliebelle Alvior
