Arestado ng mga operatiba ng Banisilan Municipal Police Station ang isang indibidwal sa kasong paglabag sa Illegal Possession of Firearms and Ammunition sa Barangay Salama, Banisilan, Cotabato nito lamang Enero 6, 2025.
Kinilala ni Police Major Jun Napat, Officer-In-Charge ng Banisilan Municipal Police Station, ang suspek na si alyas “Teng”, may asawa at residente ng nasabing barangay.
Ayon sa ulat, bandang 9:37 ng umaga ng dinala ni Barangay Chairman Datupiang Cabilo Buleg, ang suspek sa kanilang himpilan matapos makuhanan ng isang unit ng Cal. 45 na baril na may kasamang magasin at dalawang bala.
Kasong paglabag sa Republic Act 10591 o “Comprehensive Firearms and Ammunition Regulation Act” ang isasampang reklamo laban sa suspek.
Patuloy naman ang panawagan ng PNP sa publiko na makipagtulungan sa mga ahensya ng pamahalaan para sa mabilisang pagsugpo ng mga krimen at paghuli sa mga lumalabag sa batas, at kaagad na iulat sa kinauukulan ang anumang mga kahina-hinalang kilos sa paligid.
