Naaresto ang isang lalaking nasasangkot sa paglabag sa kasong paglabag sa Article 179 ng Revised Penal Code (Illegal Use of Uniform or Insignia) at Republic Act 10591 sa Barangay Silawit, Cauayan City, Isabela nito lamang ika-4 ng Enero 2025.
Kinilala ang suspek na si alyas “Jonel” na napasakamay ng mga pinagsanib na pwersa ng Cauayan CCPS katuwang ang RMU2 sa bisa ng Warrant of Arrest.
Habang isinasagawa ang naturang operasyon ng mga kapulisan ay napansin nilang mayroong dalang sling bag ang naturang suspek. Kaagad na nagsagawa ng Body Search ang mga otoridad kasama ang pagsusuri sa sling bag nito.
Nakumpiska sa suspek ang isang Glock 22 Gen 4 USA pistol na may kasamang magazine at 15 piraso ng bala ng Caliber 40mm; isang piraso ng magasin na may 15 na bala ng Caliber 9mm at walong piraso ng bala ng Caliber 45mm. Hiningan ng mga otoridad ang nasabing suspek ng mga dokumento ng nasabing baril ngunit bigo itong maipresenta, dahilan upang ito ay kumpiskahin.
Kaagad na nagsagawa ng imbentaryo at pagmamarka ang mga otoridad sa mga nakumpiskang ebidensya sa harap ng suspek na nasaksihan ng Barangay Kagawad ng nasabing lugar.
Ang suspek ay dinala sa Cauayan District Hospital para sa pisikal na pagsusuri at pagkatapos ay dinala ang suspek at ang mga nakumpiskang ebidensya sa Cauayan CCPS, habang inihahanda ang kaniyang isa pang kasong paglabag sa Republic Act 10591 o “Comprehensive Firearms and Ammunition Regulation Act”.
Patuloy ang Pambansang Pulisya sa layunin nito labanan sa iligal na droga na mapigilan ang paglaganap sa bansa sa pamamagitan ng mas pinatinding operasyon at kampanya para sa kapayapaan at kaayusan tungo sa Bagong Pilipinas.
Source: PNP Isabela
