Tiklo ang isang High Value Target sa buy-bust operation ng mga operatiba ng Sinait Police Station sa Barangay Purag, Sinait, Ilocos Sur nito lamang ika-10 ng Nobyembre, 2024.
Kinilala ni Police Captain Bryan Romero A Lopez, Officer-In-Charge ng Sinait Municipal Police Station, ang suspek na si Joe Ephraim Mangrubang y Gudoy, 34, isang manggagawa at magsasaka, at kasalukuyang nakalista sa Top 17 HVT ng Regional Drug Target List.
Nakuha mula sa suspek ang mahigit 30 gramo ng hinihinalang shabu, na may kabuuang halaga na aabot sa Php184,000. Kabilang din sa mga nakumpiskang ebidensya ang buy-bust money, mga boodle money, isang cellular phone, facemask na ginamit sa pagbalot ng droga, at isang motorsiklo.
Matapos ang pagkakaaresto, dinala ang suspek sa Ilocos Sur District Hospital sa Sinait para sa isang medical examination. Ang mga nakumpiskang droga ay isasailalim sa laboratory examination upang matukoy ang eksaktong nilalaman nito.
Patuloy na nakatutok ang mga awtoridad sa mga high value targets sa rehiyon at nagsasagawa ng mga operasyon upang mapigilan ang paglaganap ng mga ipinagbabawal na gamot. Nanawagan din ang Sinait Police Station sa publiko na magpatuloy sa kanilang suporta sa laban kontra droga at magbigay ng impormasyon upang mapigilan ang ilegal na kalakalan ng droga sa kanilang mga komunidad.
Source: Sinait MPS
Panulat ni PSSg Marvin Jake Romero
