Koronadal City – Sugatan ang isang lalaki matapos ang nangyaring pagsabog ng isang unit ng Yellow Bus Line habang tinatahak ang daan papuntang Aquino St. corner Gensan Drive, Koronadal City nito lamang Mayo 26, 2022.
Kinilala ni PBGen Alexander Tagum, Regional Director ng PRO 12 ang sugatang biktima na si Wilfredo Ilagan Pino, 59, isang tricycle driver at residente ng Purok Mabuhay, Brgy. Magsaysay, Koronadal City, South Cotabato.
Ayon kay PBGen Tagum, ang bus ay galing sa lungsod ng Tacurong at bago pa man sila nakaabot sa lungsod ay may nakita na ang konduktor ng bus na isang mabigat na bagahe na may lamang sapatos. Itinapon ito ng konduktor sa likurang bahagi ng bus dahil walang nagmamay-ari. Ngunit pagdating sa bahagi ng Aquino St. Corner Gensan Drive Koronadal City ay bigla nalang sumabog ang likurang bahagi ng sinasakyan nilang bus.
Sa lakas ng pagsabog ay nadamay ang tricycle na sumusunod sa bus at nasugatan ang driver nito. Ngunit, wala namang naiulat na nadamay sa mga pasahero ng bus kabilang na ang driver at konduktor. Agad naman isinugod sa ospital ang nasugatang tricycle driver.
Tiniyak naman ni PBGen Tagum sa publiko na ang PRO 12 ay nakatutok na para alamin kung sino ang salarin sa likod ng nasabing insidente.
Agad nitong pinag-utos na magpatawag ng Special Investigation Task Group para pangunahan ang Post Blast Investigation kasama ang command group, quad staff, PD South Cotabato, COP Koronadal CPS at Chief, EOD para tugunan ang nasabing insidente sa lugar.
Inatasan din ni PBGen Tagum ang mga Provincial at City Directors at lahat ng Police Offices sa PRO 12 na magtalaga ng mga bus marshal sa lahat ng mga pangunahing terminal ng bus at paigtingin ang kanilang mga hakbang panseguridad. Kasabay nito, hinihiling niya ang kooperasyon ng publiko na iulat ang anumang kahina-hinalang indibidwal o aktibidad sa pinakamalapit na pulis o Security unit.
###
Panulat ni Patrolman Gio Batungbacal
