General Santos City – Matapos matukoy ang isa sa mga suspek sa likod ng pambobomba sa Yellow Bus Line (YBL) sa Tacurong City noong nakaraang linggo ay patuloy namang tinutugis ang iba pang kasamahan nito sa pangunguna ng Special Investigation Task Group (SITG) nito lamang ika-9 ng Nobyembre 2022.
Matapos ang malalimang pag-iimbestiga ng SITG, lumalabas na si Esmael Daomilang y Tamama, 55, ay sangkot sa likod ng pambobomba kung saan isa siya sa malubhang nasugatan matapos ang pagsabog ng naturang bus.
Kaagad namang sinampahan ang suspek ng kasong paglabag sa RA 11479 (Anti-Terrorism Act of 2020) sa City Prosecution Office.
Binigyang papuri naman ni Police Brigadier General Jimili Macaraeg, PRO 12, Regional Director, ang mabilisang pagresolba ng SITG sa ilalim ng pamumuno ni PCol Rogelio Raymundo Jr sa nasabing krimen.
Matatandaan na isa ang patay at 11 naman ang sugatan sa pagpapasabog sa YBL Bus sa Tacurong City noong ika-6 ng Nobyembre 2022.
Tiniyak naman ni Police Brigadier General Jimili L Macaraeg, PRO 12, Regional Director, na patuloy pa rin ang pagpapatupad ng mahigpit na seguridad sa buong rehiyon upang matukoy pa ang ibang kasamahan ng suspek.
Gayunpaman para kundinahin ang grupo ng Dawlah Islamiyah, na pinaniniwalaang responsable sa pambobomba sa YBL sa rehiyon.
Source: Police Regional Office 12 – Public Information Office
Panulat ni Patrolman Khnerwin Jay A Medelin
