Camp BGen Rafael T. Crame – Nagbigay ng panayam sa isang Press Briefing ng Philippine National Police sa pangunguna ni Chief, PNP Police General Rodolfo S. Azurin, Jr. sa mga mamamahayag ng PNP Press Corps kaugnay ng nalalapit na paggunita ng Undas, at sa patuloy na imbestigasyon sa pagkamatay ng isa sa “middlemen” na si Cristito Villamor ngayong araw ng Lunes, ika-24 ng Oktubre 2022, na isinagawa sa PNP Grandstand, Kampo Crame, Quezon City.
Ayon kay PGen Azurin, patuloy pa rin ang isinasagawang imbestigasyon patungkol sa pagkamatay ng isa sa mga middlemen na positibong tinukoy ng sumukong gunman na si Joel Escorial sa pagpatay sa broadcaster na si Percival Mabasa o mas kilala bilang Percy Lapid noong Oktubre 3, 2022.
Dagdag pa ni Southern Police District Director Police Brigadier General Kirby John Kraft, kasalukuyan nang iniimbestigahan ang mga posibleng kasabwat sa pagpatay sa middleman na kinilala nang si Cristito Villamor Palaña batay sa birth certificate na binigay ng kanyang kaanak.
Samantala, nagbigay din ng pahayag ayon sa paghahanda ng PNP sa inaasahang pagbugso ng publiko bunsod ng nalalapit na paggunita ng Undas at long weekend.
Ang Pambansang Pulisya ng Pilipinas ay patuloy na magbabantay upang masiguro ang kaligtasaan ng publiko at katahimikan ng pamayanan.
Panulat ni Pat Noel Lopez
