Sumisip, Basilan – Patay ang isang Imam at apat naman ang sugatan matapos pagbabarilin ng hindi pa nakikilalang mga suspek sa Brgy. Sapa Bulak, Sumisip, Basilan noong Abril 22, 2022.
Kinilala ni PMaj Faisal Tandico, Chief of Police ng Sumisip Municipal Police Station ang nasawing biktima na si Mutilah Como Ajanab, 20, at ang apat na sugatan na sina Rashid Hajibain Suraman, 48, Abdulmalik Suraman Jumlatal, 34, Harisa Hajibain Hadjil, 15, at si Hagidz Suraman Jumlatal.
Ayon sa inisyal na imbestigasyon, habang nagpapahangin sa labas ng mosque ang mga biktima pagkatapos ng kanilang Ramadan Traditional Tarawi Prayer ay biglang dumaan ang mga armadong grupo na walang habas na pinagbabaril ang mga ito.
Agad namang dinala sa Infante Hospital ang mga biktima ngunit binawian na rin ng buhay ang 20 anyos na Imam samantala ang apat na sugatan ay kasalukuyang ginagamot.
Patuloy naman ang imbestigasyon ng Sumisip PNP upang matuloy ang pagkakakilanlan ng mga salarin at kung ano ang posibleng motibo ng mga ito.
###
Panulat ni Patrolman Mark Vincent Valencia
