Arestado ang dalawang indibidwal sa isinagawang search warrant operation ng mga awtoridad matapos marekober sa kanilang tahanan ang ilegal na baril at mga droga sa Barangay Dadiangas West, General Santos City nito lamang Pebrero 6, 2025.
Kinilala ang dalawang target ng operasyon na sina alyas “Loli” at si alyas “Rop”, parehong nasa wastong gulang at residente ng nasabing lugar.
Ganap na 5:04 ng hapon nang isinilbi ng pulisya ang search warrant laban sa dalawa na kung saan narekober sa loob ng bahay ng mga suspek ang tatlong heat-sealed transparent plastic sachets na naglalaman ng hinihinalang shabu, isang yunit ng Cal. 22 revolver na may kasamang walong bala, at drug paraphernalia.
Mahaharap ang dalawang suspek sa kasong paglabag sa Republic Act 10591 o “Comprehensive Firearms and Ammunition Regulation Act” at Republic Act 9165 o “Comprehensive Dangerous Drugs Act of 2002”.
Patuloy ang kampanya ng PNP para sa mga loose firearms at ilegal na droga. Nanawagan sa iba pang may-ari ng baril na walang kaukulang dokumento na isuko ang kanilang baril upang maiwasan na magkaroon ng kaso.
