Santiago City, Isabela – Naghandog ng ika-4 na Project PAILAW ang PNP Lady Warriors sa Barangay Patul, Santiago City, Isabela noong Abril 17, 2022.
Ayon kay Police Lieutenant Colonel Ednalyn Pamor, Force Commander ng All Women Santiago City Mobile Force Company, si Ginoong Rojelito Florendo Bermudez, 62, biyudo, may walong anak, construction worker ang napili bilang ika-apat na benepisyaryo ng proyekto.
Maliban sa solar lights ay nakatanggap din ng food packs ang pamilya ni Mang Rojelito.
Layon ng proyektong ito na bigyang liwanag ang bahay ng mga pamilyang hindi makayang magkaroon ng kuryente mula sa electric cooperative lalo na sa liblib na lugar.
Ang proyekto ay alinsunod sa PNP Core Values na “Makatao”.
Naging katuwang ng PNP Lady Warriors ang mga opisyal ng Barangay at Barangay Tanod sa paghandog ng nasabing proyekto.
Magpapatuloy sa pagpapaabot ng libreng pailaw ang Santiago CMFC sa mga mamamayan ng lungsod upang masiguro ang seguridad ng pamayanan lalo na ang mga mag-aaral.
Source: All Women Santiago City Mobile Force Company
###
Panulat ni Police Corporal Carla Mae P Canapi
