Ipinagdiwang ng Himpilan ng Pambansang Pulisya ng Pilipinas ang ika-126 na taon ng Araw ng Kalayaan na may temang “Kalayaan, Kinabukasan, Kasaysayan” sa National Headquarters, Camp BGen Rafael T Crame, Quezon City nitong ika-12 ng Hunyo, taong kasalukuyan.
Sa seremonya, binigyang-diin ni Police General Rommel Francisco Marbil sa pamamagitan ni PLtGen Emmanuel B Peralta, Acting Deputy Chief for Administration, ang tema ngayong taon tungkol sa kahalagahan ng pagbabalik-tanaw at pagpupugay sa katapangan at mga sakripisyo ng ating mga bayani makamit lamang ang kalayaang tinatamasa natin ngayon at ng susunod na henerasyon.
Pinapaalalahanan din ang bawat isa na gawing inspirasyon ang ating soberanya para maging mas huwaran sa pagliligkod sa ating mamamayan.
Ang mga sakripisyo ng ating mga ninuno ay nagpapahintulot sa atin na parangalan ang katapangan ng ating mga bayani—yaong mga matapang na nakipaglaban para sa ating inang bayan.
Mula sa pamumuno ni Emilio Aguinaldo noong kolonisasyon ng mga Espanyol hanggang sa mga pakikibaka laban sa pamumuno ng mga Amerikano, ang kanilang hindi natitinag na dedikasyon ay naging daan para sa ating soberanya.
Sa pamamagitan ng pag-alala sa kanilang mga kabayanihan, binibigyang-pugay natin ang kanilang pamana at nagbibigay-inspirasyon sa mga susunod na henerasyon na pahalagahan ang kalayaan ng ating bansa.
Nagtapos ang nasabing seremonya sa pagpapalipad ng mga kalapati at pagwagayway ng mga flaglets na sumisimbulo ng kasarinlan ng ating bansang sinilangan.
