Cebu City – Sa pangunguna ng Alkalde ng Cebu City, Hon. Michael Lopez Rama, ginunita nito lamang Lunes, Hunyo 12, 2023 ang pagdiriwang ng ika-125 na Anibersaryo ng Araw ng Kalayaan na ginanap sa Plaza Independencia, Cebu City.
Ang makabuluhang aktibidad ay dinaluhan ng ilang matataas na opisyal ng iba’t ibang sangay ng pamahalaan kabilang na ang Regional Director ng Police Regional Office 7, Police Brigadier General Anthony Aberin, mga pamunuan at miyembro ng Philippine Army, Philippine Navy, Bureau of Fire and Protection at iba pa.
Bilang bahagi ng tradisyon, ang pagtaas at sabayang pag-awit ng Pambansang Awit ng Pilipinas ay isa sa mga pangunahing sentro ng aktibidad na sinundan ng Civic Military Parade.
Sa kaparehong aktibidad, isinagawa ang sabayang pagwawagayway ng watawat, pagpapalipad ng mga puting kalapati, at libreng konsyertong handog ng PRO 7 Band sa Camp Sergio Osmeña Sr., Cebu City.
Ang paggunita ng naturang taunang selebrasyon ay sumisimbolo sa walang humpay na pagbibigay pugay mula sa tagumpay at kalayaan na ating nakamit at patuloy na tinatamasa sa kasalukuyan.
