Kalakip ang temang, “Pag-suong sa Hamon ng Panibagong Bukas”, buong pusong nakiisa at sumuporta ang hanay ng Police Regional Office 7 sa pagdiriwang ng ika-124 na Araw ng Kalayaan ng ating bansa na ginunita nito lamang umaga ng Linggo, ika-12 ng Hunyo sa Plaza Sugbo, Cebu City.
Naging sentro ng nasabing selebrasyon ang sabay-sabay na pagtaas ng pambansang watawat at Wreath Laying Ceremony na pinangunahan ni Hon. Michael Rama, Cebu City Mayor, mga kawani ng lokal na pamahalaan at mga ahensya na nagpapatupad ng batas.
Nakatuon naman ang mensahe ng naturang programa sa naging pagbangon at paninindigan ng bansa sa pagharap sa mga problema ng mga nakaraang taon, partikular na ang pakikipaglaban sa pandemya na COVID-19.
Alinsunod sa pagdiriwang, sinabi naman ng Director, PRO7 Police Brigadier General Roque Eduardo Vega, ipinakita ng PRO 7 ang pusong makabayan sa pamamagitan ng pagtupad sa sinumpaang tungkulin na paglingkuran, protektahan at pangalagaan ang mamamayan.
“Ayon sa ating Officer-in-Charge ng PNP, PLtGen Vicente D Danao Jr, ang Philippine National Police ay nagbigay ng isang Serbisyong TAMA: Pulis na may Takot sa Diyos, Tapat sa kanyang panunungkulan, Pulis na may TApang sa mga lumalabag sa batas, at pulis na may Malasakit sa buong sambayanang Pilipino,” ani Vega.
Idinagdag niya na ipinakita ng pulisya ang kanilang dedikasyon at pangako bilang mga frontliners at vanguard ng seguridad at kapayapaan, lalo na dito sa Central Visayas.
” Inaalay din namin ito sa mga kasamahan naming nabuhay sa gitna ng laban at panganib na dala ng pandemya, kriminalidad at giyera, maituturing mga bayani ng makabagong panahon. Kinikilala at pinapasalamatan natin sila sa kanilang kadakilaan at sakripisyo para sa bansa”, sabi ni Vega.
Kasabay ng pagdiriwang, ang PNP ay nanguna sa pamimigay ng seguridad, tulong sa trapiko, at nag-deploy ng mga tauhan upang siguraduhin ang ligtas at matiwasay na programa.
###
