Pinangunahan ni Vice-President-Elect at Davao City Mayor Sara Duterte ang isinagawang Flag Raising Ceremony sa Davao City Hall bilang paggunita sa ika-124 taon ng Araw ng Kalayaan kung saan ay nag-alay ito ng bulaklak o wreath-laying sa Monumento ng Pambansang Bayani na si Dr. Jose Rizal, ngayong araw ng Hunyo 12, 2022.
Dumalo sa programa si Police Brigadier General Benjamin Silo Jr., Regional Director ng Police Regional Office 11 bilang pakikiisa ng PNP sa lokal na pamahalaan.
Samantala, isinagawa naman ng Police Regional Office 11 ang Flag Raising nito sa Pulis Bagani Hall, Camp Sgt. Quintin M Merecido na pinangunahan naman ni Police Brigadier General Edgar Alan Okubo, Deputy Regional Director for Administration kasama ang mga miyembro ng Command Group, R-Staff at kapulisan ng PRO11.
Ibinahagi ni PBGen Okubo ang mensahe ni PLtGen Vicente Danao Jr., Officer-in-Charge ng Philippine National Police.
“Saksi ang Sambayanang Pilipino sa giting, sipag at sakripisyo ng Kapulisan. Ipinamalas natin ang isang pusong makabayan sa pamamagitan nang pagtupad sa ating sinumpaang tungkulin na pagsilbihan, protektahan at pangalagaan ang ating mga mamamayan. Nagbigay tayo ng isang “Serbisyong TAMA”: Pulis na may Takot sa Diyos, Tapat sa kanyang panunungkulan, Pulis na may Tapang sa mga lumalabag sa batas, at Pulis na may Malasakit sa buong sambayanang Pilipino”, saad ng mensahe.
Isinagawa ang sabay-sabay na Pagpupugay sa Watawat at pag-aalay ng mga bulaklak sa buong Pilipinas bilang pagkilala at paggunita sa kadakilaan ng ating mga bayani na naging daan sa ating Kalayaan.
“Pagsuong sa hamon ng Panibagong Bukas” ang naging tema ng ika-124 taon ng Kalayaan 2022.
###
Panulat ni Patrolwoman Rose Ann Delmita
