Tiklo sa ikinasang buy-bust operation ng mga otoridad ang isang High Value Individual sa Purok 7, Barangay Dansuli, Isulan, Sultan Kudarat nito lang Hulyo 14, 2024.
Kinilala ni Police Lieutenant Colonel Julius R Malcontento, Hepe ng Isulan Municipal Police Station, ang suspek na si alyas “Mar”, 29 anyos, binata at residente ng South Sepaka, Bagumbayan, Sultan Kudarat.
Ayon kay PLtCol Malcontento, bandang 4:30 ng hapon nang maaresto ang suspek ng mga tauhan ng Sultan Kudarat Provincial Drug Enforcement Unit (Lead Unit), Isulan Municipal Police Station at 1st Sultan Kudarat Provincial Mobile Force Company, matapos makabili ng hinihinalang shabu sa nagpanggap na poseur buyer kapalit ng buy-bust money.
Kumpiskado mula sa suspek ang apat na piraso ng plastic sachets ng pinaghihinalaang shabu na may timbang na pitong gramo na nagkakahalaga ng Php47,600 at Php1,000 bill bilang buy-bust money.
Nahaharap ang suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Bilang pagsuporta sa programa ng Pangulong Ferdinand R Marcos Jr., sa pakikipaglaban sa problema ng ilegal na droga, ang buong hanay ng PNP ay patuloy na paiigtingin ang paghuli sa mga taong nagpapalaganap ng ipinagbabawal na gamot upang mapanatili ang kaayusan at kaligtasan ng komunidad.
Panulat ni Patrolwoman Flora Mae Asarez
