Nahuli ng mga awtoridad ang isang High Value Individual sa isinagawang buy-bust operation ng Angeles City PNP sa ilalim ng Abacan Bridge, Barangay Ninoy Aquino, Angeles City nito lamang Mayo 2, 2025 bandang 11:30 ng gabi.
Ayon kay Police Colonel Joselito E. Villarosa Jr., Acting City Director ng Angeles City Police Station, ang suspek ay kinilalang si alyas “Batal,” 37 taong gulang, walang trabaho at nakatira sa 199 Purok 2, Barangay Pampanga, Angeles City.
Pinangunahan ng Intel/SDEU ng Police Station 6 kasama ang Drug Enforcement Unit (DEU) ng Angeles City Police Office (ACPO) ang matagumpay na buy-bust operation na nauwi sa pagkakadakip ng suspek.
Nakumpiska mula sa suspek ang tinatayang 55 gramo ng hinihinalang shabu na may street value na Php374,000, isang pre-marked na Php1,000 bill, pitong (7) piraso ng Php1,000 boodle money na ginamit bilang buy-bust money, at isang (1) itim na pouch na may tatak na “RICH.”
Kakaharapin ng nahuling suspek ang kasong paglabag sa Section 5 (sale of dangerous drugs) at Section 11 (possession of dangerous drugs) ng Article II ng Republic Act 9165 o ang “Comprehensive Dangerous Drugs Act of 2002”.
Patuloy ang pagpapaigting ng Angeles City PNP sa kanilang kampanya laban sa iligal na droga sa lungsod.
