Tinatayang Php986,000 halaga ng suspected shabu ang nakumpiska sa dalawang naarestong High Value Individual sa inilunsad na drug buy-bust operation sa Zone 2, Baldoza, La Paz, Iloilo City, nito lamang ika-14 ng Nobyembre 2023.
Pasado alas-kwatro ng hapon ng ilunsad ang buy-bust ng mga operatiba ng Iloilo City Drug Enforcement Unit (CDEU), kasama ang mga operatiba mula sa ICPS1, ICPS4, at ng ICPS 2.
Ayon kay PLtCol Antonio Benitez Jr., Hepe ng CDEU-ICPO, nakuha mula sa mga suspek ang 12 na pakete na naglalaman ng hinihinalang shabu kabilang na ang buy-bust item na may kabuuang timbang na 145 gramo.
Bukod sa droga, nabawi sa mga drug suspek ang ginamit na buy-bust money, mga drug paraphernalia, at ilang non-drug items.
Dinala ang mga naaresto sa himpilan ng Lapaz Police Station, at sila ay nahaharap sa kasong paglabag sa RA 9165 o ang Comprehensive Dangerous Drugs Act of 2002.
Ang matagumpay na operasyon ay isa lamang patunay na mas umiigting pa ang kampanya kontra ilegal na droga ng ating kapulisan para sa kaayusan ng komunidad at kaligtasan ng mamamayan mula sa nakakasirang epekto ng ipinagbabawal na droga.
