Nasabat ang tinatayang Php1,972,000 halaga ng shabu sa naarestong tatlong indibidwal, kabilang ang isang High Value Individual (HVI) at isang menor de edad sa buy-bust operation na isinagawa sa Barangay Zone 1, Inventor Street, Estancia, Iloilo nito lamang ika-12 ng Pebrero 2025.
Ang operasyon ay isinagawa ng Iloilo Police Provincial Office Drug Enforcement Unit sa pamumuno ni Police Major Dadje Delima, Chief, IPPO-PDEU Team 3, katuwang ang iba pang miyembro ng pulisya.
Kinilala ang mga naarestong suspek na si alyas “Apple,” 32 taong gulang, itinuturing na High Value Individual (HVI), at matatandaang kamakailan lamang ay nag-live ito kasama ang kanyang mga kamag-anak habang gumagamit ng shabu sa loob ng kanilang bahay.
Nadakip din si alyas “Michael,” 21 taong gulang at classified bilang Street Level Individual (SLI), pati na rin si alyas “Christian,” isang 17 anyos na menor de edad. Lahat sila ay walang trabaho at residente ng Barangay Zone 1, Inventor Street, Estancia, Iloilo.
Nahuli ang mga suspek matapos makuhanan ng isang sachet ng hinihinalang shabu na ibinenta sa isang police poseur buyer.
Bukod sa buy-bust item, nasamsam rin sa kanilang pag-iingat ang tatlong knot-tied sachets ng hinihinalang shabu, dalawang heat-sealed plastic sachets ng shabu, at buy-bust money na nagkakahalaga ng Php6,000.
Sa kabuuan, nasa humigit kumulang 290 gramo ng iligal na droga ang nakumpiska na may tinatayang Standard Drug Price na Php1,972,000. Ang inventory ng mga nasamsam na ebidensya ay isinagawa sa lugar mismo ng operasyon at nasaksihan ng isang Barangay Kagawad mula sa Barangay Camambugan, Balasan, Iloilo, at isang kinatawan mula sa media.
Sila ay isinailalim sa medikal na pagsusuri bago sumailalim sa booking procedures para sa pagsasampa ng kaukulang kaso sa ilalim ng Republic Act 9165 o ang Comprehensive Dangerous Drugs Act of 2002.
Patuloy ang Philippine National Police sa kanilang kampanya laban sa iligal na droga upang mapanatili ang kapayapaan at kaayusan sa komunidad, tungo sa mas mapayapang Bagong Pilipinas.
