Nasabat ng pulisya ang higit Php1.8 milyong halaga ng shabu sa dalawang naarestong drug suspek sa isinagawang drug buy-bust operation ng Regional Police Drug Enforcement Unit 6 sa Barangay Calumpang, Molo, Iloilo City nito lamang ika-19 ng Hulyo 2024.
Kinilala ang mga suspek na sina alyas “Toto”, 37anyos at alyas “Madam”, 37 anyos at residente ng Zone 1, Estancia Iloilo.
Ayon kay Police Captain Ryan Christ Inot, Team Leader ng RPDEU 6, isang linggo nilang minonitor ang mga nahuli at nakatanggap ng impormasyon ang mga operatiba na may kukunin silang kontrabando sa syudad ng Iloilo.
Narekober sa mga suspek ang tatlong knot-tied plastic sachets ng pinaghihinalaang shabu, buy-bust money na Php40,000, dalawang malaking knot-tied plastic sachets ng pinaghihinalaang ilegal na droga.
Sa kabuuan ay nasa humigit kumulang Php1,836,000 ang Standard Drug Price ng ilegal na droga ang narekober.
Ang mga suspek ay mahaharap sa kasong paglabag sa Republic Act 9165 o Comprehensive Dangerous Drugs Act of 2002.
Layunin ng Iloilo City PNP na matigil ang paglaganap ng ilegal na droga sa kanilang nasasakupan.
Source: XFM Radyo Patrol Iloilo
Panulat ni Pat Ryza Valencia
