Iloilo City – Nakumpiska ang tinatayang Php1.3 milyong halaga ng shabu sa naarestong ex- convict at market vendor sa buy-bust operation ng mga operatiba ng Iloilo PNP sa Iloilo City nitong Mayo 14, 2022.
Kinilala ni Police Lieutenant Colonel Mark Anthony Darroca, Chief, Regional Police Drug Enforcement Unit VI, ang suspek na si Res Leonardo, 46, market vendor at residente ng Zone 2, Brgy. Tanza, Ezperanza, Iloilo City.
Ayon kay Police Lieutenant Colonel Darroca, nahuli ng mga operatiba ng RPDEU-VI at Molo Police Station, ang suspek matapos nagbenta ng isang sachet ng hinihinalang shabu sa ICAG Road, Brgy Taal, Molo, Iloilo City.
Nakumpiska rin sa suspek ang 26 pang mga sachet ng parehong ipinagbabawal na droga. Tinatayang umabot sa 200 grams ang bigat ng mga nakumpiskang shabu sa suspek na may Standard Drug Price na Php1,360,000.
Dagdag pa ni PLtCol Darroca, ang suspek ay isang bodegero at may connection sa isang inmate sa National Bilibid Prison (NBP) na isang Mark Baylon. Si Leonardo ay nakulong sa kasong homicide at natapos ang sentensya sa NBP, ngunit noong 2018, nasama ito sa listahan ng mga natokhang sa nasabing lugar.
Samantala mariin namang itinanggi ng suspek na siya ay gumagamit ng nasabing ipinagbabawal na droga ngunit ito ay nakatakdang sasailalim sa drug test bilang bahagi ng proseso.
Nahaharap ang suspek sa kasong paglabag sa RA 9165 o Comprehensive Dangerous Drugs Act of 2022.
###
