Negros Occidental -Timbog ang isang mangingisda matapos makuhanan ng higit sa isang milyong halaga ng shabu sa isinagawang buy-bust operation ng Silay City Police Station sa Sitio Dacutan Dacu, Barangay Mambulac, Silay City, nitong Miyerkules, bandang 9:54 ng umaga noong ika-10 ng Enero 2024.
Kinilala ni Police Lieutenant Colonel Mark Anthony D Darrocca, Hepe ng Silay City Police Station, ang drug suspek na si alyas “Jr”, 42, residente ng nasabing lugar at nakatala bilang isang High Value Individual.
Narekober kay alyas “Jr” ang 21 pakete ng hinihinalang shabu na may bigat na 170 gramo na aabot sa halagang Php1,156,000, buy-bust money na nagkakahalaga ng Php6,000, isang improvised tooter, isang handmade shotgun, isang 38 revolver, isang live ammunition at iba pang non-drug items.
Ayon kay PLtCol Darroca, nasagip sa naturang operasyon ang 2 menor de edad na kasama ng suspek at kasalukuyang nasa pangangalaga na ng Silay City Youth Center.
Ang suspek ay mahaharap sa kasong paglabag sa RA 9165 o Comprehensive Dangerous Drugs Act of 2002.
Ang matagumpay na operasyon ng kapulisan ay nagpapakita ng dedikasyon, kooperasyon at patuloy na suporta ng komunidad para masugpo ang ilegal na droga at hinahangad na Drug-Free Western Visayas.
