Umabot sa mahigit 100 indibidwal ang naaresto sa 24-oras na Simultaneous Anti-Criminality and Law Enforcement Operations (SACLEO) ng Police Regional Office (PRO) 2 noong Nobyembre 15-16, 2021.
Kabilang sa mga nadakip ang 10 na Top Most Wanted Persons at 104 iba pang Wanted Persons sa ikinasang 105 police operations.
Dagdag pa rito, isinagawa ang anim (6) na anti-illegal drug operations kung saan naaresto ang limang (5) suspek at sumuko naman ang apat (4) na iba pa. Nakumpiska ang 1.25 gramo ng hinihinalang shabu at 0.70 gramo ng marijuana na may Dangerous Drugs Board value na Php9,050.
Samantala, arestado rin ang 23 indibidwal sa apat (4) na anti-illegal gambling operations ng pulisya habang 12 naman ang dinakip na suspek, at anim (6) na pampasabog at 23 na baril ang nakumpiska dahil sa paglabag ng Republic Act 10591 o Comprehensive Firearms and Ammunition Regulation Act.
Nasa 2,500 board feet naman ng sawn lumbers na tinatayang nagkakahalaga ng Php112,500 ang nasabat dahil sa paglabag ng Presidential Decree 705 o Forestry Reform Code of the Philippines.
Bilang bahagi ng kanilang National Task Force to End Local Communist Armed Conflict (NTF-ELCAC) campaign, tatlong (3) miyembro ng CTG, 30 taga-suporta at tatlong (3) miyembro ng Militia ng Bayan ang sumuko at nagbalik-loob sa pamahalaan.
Pinapurihan ni PRO2 Regional Director, Police Brigadier General Steve B. Ludan ang Valley Cops sa masigasig na pagtupad sa kanilang mandato upang mapanatiling ligtas, maayos, at mapayapa ang buong Rehiyon Dos.
“The result of the one-day SACLEO is a manifestation of the hardwork and dedication of the men and women of PRO2 in striving for a peaceful and tenable Cagayan Valley,” ani PBGen Ludan.
#####
Panulat ni: Police Corporal Josephine T Blanche
