Lapu-Lapu City – Tinatayang nasa higit isang kilo ng hinihinalang shabu ang nasamsam ng mga tauhan ng Lapu-Lapu City Police Office mula sa babaeng suspek sa drug-bust operation sa Sitio Kamansi, Brgy. Pajo, Lapu-Lapu City noong Lunes, Nobyembre 6, 2023.
Tinukoy ni PCol Elmer Lim, City Director ng Lapu-Lapu City Police Office, ang suspek na si alyas “Clars”, 30, ng Brgy. Punta Princesa, Cebu City na nadakip pasado alas-11 ng gabi.
Ayon kay PCol Lim, ang suspek ay nasakote ng mga operatiba ng City Intelligence Unit at City Drug Enforcement Unit ng Lapu-Lapu City Police Office.
Nasamsam kay alyas Clars ang 1,100 gramo o higit isang kilo ng droga na may standard drug price na Php7,480,000, isang unit ng Samsung Cellular Phone, Chinese Tea Bag, at ang 500-peso bill na ginamit na buy-bust money.
Nasa kostudiya ngayon ng himpilan ng Lapu-Lapu City PNP ang suspek na nahaharap sa mga paglabag sa RA 9165 habang ang mga nakalap na ebidensya ay naisumite sa Forensic Unit para sa pagsusuri.
Kaugnay dito, pinuri ni PBGen Anthony A Aberin, Regional Director ng Police Regional Office 7, ang husay at galing na ipinamalas ng mga operatiba sa likod ng matagumpay na operasyon.
