Iloilo City – Timbog ang isang High Value Individual (HVI) sa inilunsad na drug buy-bust operation ng pulisya sa Brgy. Calaparan, Arevalo, Iloilo City, bandang 7:30 ng gabi ng ika-7 ng Nobyembre 2023.
Kinilala ni PLtCol Antonio Benitez Jr., Hepe ng Iloilo City Drug Enforcement Unit, ang nahuling suspek na si alyas “Labsky”, 39, residente ng Brgy. Calumpang, Molo, Iloilo City.
Ayon kay PLtCol Benitez Jr., naaresto ang suspek matapos mabilhan ng Php15,000 na halaga ng hinihinalang shabu at nakuha mula rito ang pitong plastic sachets ng shabu at iba pang mga non-drug items.
Higit-kumulang 40 gramo ng suspected shabu ang kabuuang narekober sa operasyon na may tinatayang halaga na Php272,000.
Ang operasyon ay inilunsad ng pinagsamang mga operatiba ng City Drug Enforcement Unit ng Iloilo City Police Office (CDEU) sa pangunguna ni PLtCol Antonio Benitez Jr., kasama ang ICPS6 SDET at CGIGWV.
Ang suspek ay nahaharap sa kasong paglabag sa Republic Act 9165 o ang Comprehensive Dangerous Drugs Act of 2002.
Ang tagumpay na ito ay bunga ng pagsisikap ng ating kapulisan na labanan ang paglaganap ng ilegal na droga sa komunidad at sa dedikasyon na panatilihing ligtas ang mga mamamayan mula sa masamang epekto nito.
