Arestado ang isang High Value Individual (HVI) makaraang makumpiskahan ng nasa higit Php190,000 halaga ng ilegal na droga sa ikinasang buy-bust operation ng mga operatiba ng South Cotabato PNP noong Enero 12, 2024.
Kinilala ni Police Lieutenant Colonel Conrado Jovero Jr., Hepe ng Surallah Municipal Police Station, ang nadakip na suspek na si alyas “Kennard”, 31, magsasaka, at residente ng Brgy. Dajay, Surallah, South Cotabato.
Dakong 3:53 ng hapon nang dakpin ang suspek sa Purok Masinadyahon, Brgy. Dajay, Surallah, South Cotabato matapos ang ikinasang operasyon ng puwersa ng Surallah Municipal Police Station, Regional Special Operations Group 12, South Cotabato Police Drug Enforcement Unit, Provincial Intelligence Unit, Regional Intelligence Division-12 at 2nd South Cotabato Provincial Mobile Force Company.
Narekober mula sa pag-iingat ng suspek ang 14 plastic sachets ng hinihinalang shabu na may kabuuang timbang na humigit-kumulang 28 gramo na may Standard Drug Price na Php190,400, buy-bust money, mga drug paraphernalia, at iba pang non-drug items.
Ang naarestong indibidwal ay nahaharap sa kasong paglabag sa Comprehensive Dangerous Drugs Act of 2002 o RA 9165.
Ang matagumpay na operasyon ay bunga ng pagsisikap ng South Cotabato PNP na labanan ang paglaganap ng ilegal na droga sa lalawigan at sa dedikasyon na panatilihing ligtas ang mga mamamayan mula sa masamang epekto nito.
Panulat ni Patrolman Khnerwin Jay A Medelin
