Arestado ang isang High Value Individual mula sa Metro Manila sa isinagawang buy-bust operation ng PNP sa Barangay Grijalvo, San Fernando, Camarines Sur bandang 11:30 ng umaga nitong Mayo 18, 2025.
Ang operasyon ay resulta ng maingat na pagmamanman at koordinasyon ng Regional Police Drug Enforcement Unit 5, San Fernando Municipal Police Station Drug Enforcement Unit, at Camarines Sur Police Provincial Office, sa tulong ng Philippine Drug Enforcement Agency (PDEA) Regional Office V.
Kinilala ang nahuling suspek na si alyas “Alex,” 38 taong gulang at residente ng Pasay City.
Nasamsam mula sa kanya ang apat (4) na sachet ng hinihinalang shabu, kabilang na ang isa na nakuha sa aktwal na transaksyon. Kasama rin sa nakumpiska ang marked money na ginamit sa entrapment operation, ilang piraso ng boodle money, at isang cellphone na pinaniniwalaang ginagamit sa kanyang iligal na kalakalan. Tinatayang umaabot sa 200 gramo ang kabuuang timbang ng droga na may halagang Php1.36 milyon.
Ang suspek ay pansamantalang nakakulong sa San Fernando Police Station habang inihahanda ang mga kasong isasampa sa ilalim ng Republic Act 9165, partikular sa mga probisyon laban sa pagbebenta at pag-iingat ng ipinagbabawal na gamot.
Nagpahayag ng pasasalamat ang pamunuan ng San Fernando MPS sa publiko sa patuloy na suporta at pakikipagtulungan, at hinikayat ang lahat na mag-ulat agad sa mga awtoridad ng anumang kahina-hinalang aktibidad upang mapanatili ang kaligtasan ng buong komunidad.
Source: San Fernando MPS Camarines Sur PPO
Panulat ni PSSg Mercolito P Lovendino Jr
