Nasakote ng mga miyembro ng City Intelligence Unit at City Drug Enforcement Unit ng Cebu City Police Office (CCPO) ang tinuturing na isang high profile drug personality sa isinagawang buy-bust operation sa Nichols Height, Barangay Guadalupe, Cebu City pasado alas-9 ng gabi noong Sabado, Pebrero 10, 2024.
Kinilala ni Police Colonel Ireneo B Dalogdog, City Director ng CCPO, ang nadakip na suspek na si alyas “Boshook”, 22, residente ng Barangay Sambag 1, Cebu City.
Ayon kay PCol Dalogdog, bago pa ang operasyon, isinailalim na ang suspek sa halos 2 linggong surveillance kung saan nabatid na nakapagbenta ito ng nasa higit isang kilo ng shabu sa loob ng isang linggo.
Nakuha sa pag-iingat ng suspek ang nasa 1.55 kilo ng hinihinalang shabu na may standard drug price na Php7,174,000, sling bag, at buy-bust money.
Muli namang hinimok ni PCol Dalogdog ang publiko na huwag mag-atubiling sumangguni sa kapulisan o sa pinakamalapit na istasyon kung may mga kahinahinalang personalidad at ilegal na aktibidad sa kanilang mga lugar.
Kasabay nito, kanyang tiniyak na ang buong kapulisan ng lungsod ay patuloy sa pagpapaigting sa kampanya kontra ilegal na droga at sa pagtugis sa mga personalidad na nasa likod nito.
Source: Cebu City Police Office
Panulat ni Pat Edmersan Llapitan
