San Carlos City, Negros Occidental – Patay ang hepe ng Guihulngan City Police Station habang sugatan naman ang apat pa nitong kasamahan matapos mabangga ang kanilang mga motorsiklo sa isang dump truck nitong hapon ng Hulyo 15, 2022 sa San Carlos City, Negros Occidental.
Kinilala ni Police Lieutenant Roby Aurita, Deputy Chief ng San Carlos City Police Station, ang nasawing biktima na si Police Lieutenant Colonel Ruben Berbo, 44, residente ng Barangay San Jose, Manjuyod, Negros Oriental at kasalukuyang hepe ng Guihulngan City Police Station.
Ayon kay PLt Aurita, nagkaroon ng mechanical malfunction ang dump truck na minamaneho ni Wenny Boy Nagor, 24, residente ng Barangay Kumaliskis, Salvador Benedicto, Negros Occidental.
Habang binabaybay ng dump truck ang pababang bahagi ng Ecotourism National Highway sa Sitio Buli, Brgy. Rizal ng nasabing lungsod, bigla na lang itong nawalan ng preno at bumangga sa tatlong motorsiklo na kasalubong nito.
Papunta sana ang mga biktima sa Negros Occidental Police Provincial Office (NOCPPO) sa Bacolod City para sa coordination meeting kaugnay sa isang Barangayanihan Activity na gaganapin sa boundary ng Guihulngan City, Negros Oriental at Isabela, Negros Occidental.
Agad namang dinala ang suspek sa San Carlos City Police Station para sa pagsampa ng kaukulang kaso at karagdagang dokumentasyon.
###
