Cebu City – Kumpiskado ng mga operatiba ng City Intelligence Unit (CIU) at City Drug Enforcement Unit (CDEU) ng Cebu City Police Office (CCPO) ang nasa halos kalahating milyong halaga ng ilegal na droga at isang kalibre ng baril sa buy-bust operation na inilunsad sa Sitio Lupa, Brgy. Kamputhaw, Cebu City noong Agosto 15, 2023.
Arestado rin sa operasyon ang puntiryadong suspek na kabilang sa talaan ng High Value Individual at Priority Target sa rehiyon.
Binigyang kilanlan ni Police Colonel Ireneo Dalogdog, City Director ng CCPO, ang suspek na si “Saldy”, 54, residente ng Cabantan St. Barangay Luz, Cebu City.
Nakuha sa pag-iingat nito ang tinatayang nasa 73 gramo ng shabu na may Standard Drug Price na Php496,400, isang unit ng S & W 357 magnum revolver, bala, sling bag, at ang nagamit na buy-bust money.
Nahaharap sa mga reklamong paglabag sa Comprehensive Dangerous Drugs Act of 2004 at Comprehensive Ammunitions and Regulation Act ang suspek.
Ang matagumpay na operasyon ay bunga ng matatag na suporta at patuloy na pakikiisa ng komunidad sa kapulisan sa kampanya kontra ilegal na droga.
