Nasabat ng mga awtoridad ang halos Php11 milyong halaga ng hinihinalang shabu mula sa isang indibidwal sa inilunsad na buy-bust operation sa Sitio Seaside, Purok 4, Barangay Taloto, Tagbilaran City, Bohol nito lamang ika-4 ng Abril 2025.
Kinilala ni Police Lieutenant Colonel John Kareen Oliveros Escober, Chief of Police ng Tagbilaran City Police Station, Bohol Police Provincial Office, ang suspek na si alyas “Bolo”, 31 taong gulang, residente ng Tamblot Ext., Barangay Cogon, Tagbilaran City, Bohol.
Dakong alas-3:18 ng hapon nang magsagawa ng buy-bust operation ang operatiba ng nasabing istasyon na kung saan naaresto ang nasabing suspek.
Nakuha mula sa suspek ang apat (4) na malalaking pakete ng hinihinalang shabu na aabot sa 1,600 gramo at may Standard Drug Price na Php10,880,000, buy-bust money, sling bag, Samsung keypad cellphone, at isang Suzuki Raider na motor.
Mahaharap ang suspek sa kasong paglabag sa Section 5 at 11, Article II ng Republic Act 9165 o ang “Comprehensive Dangerous Drugs Act of 2002”.
Patuloy naman na pinapaigting ng buong hanay ng Tagbilaran City Police Station ang kampanya kontra iligal na droga para sa pag-unlad at pagkamit ng isang maayos, ligtas, at mapayapang Bagong Pilipinas.
