Arestado ang isang public school teacher matapos mahulihan ng mga di-lisensyadong baril at bala sa ikinasang search warrant ng pulisya sa San Mateo, Isabela nitong ika-16 ng Pebrero 2024.
Kinilala ang suspek na si alyas “Dodong”, 33 taong gulang, may asawa at residente ng San Mateo, Isabela.
Sa pinagsamang operasyon ng CIDG Isabela (lead unit) at Isabela PNP ay nakumpiska sa suspek ang isang Homemade/Improvised Shotgun na may magasin, isang Taurus G3C BLK 9mm na may Serial Number na ADC754954 na may walong bala, limang bala ng 12-gauge shotgun, 116 pirasong bala ng Cal 9mm pistol, isang kulay berde at isang bughaw na ammunition case.
Mahaharap sa kasong paglabag sa Republic Act 10591 o Comprehensive Firearms and Ammunition Regulation Act ang nasabing suspek.
Sa kabilang dako, pinuri naman ni Police Brigadier General Christopher C Birung, Regional Director ng Police Regional Office 2, ang mga kapulisan sa patuloy na pagsasagawa ng matagumpay na operasyon upang maipadama ang kaligtasan at kapayapaan sa komunidad gayundin ang mithiin ng gobyerno na panatilihin ang kaayusan at protektahan ang mamamayan laban sa anumang karahasan tungo sa Bagong Pilipinas.
Source: Police Regional Office 2
Panulat ni Micah Arzadon Enriquez
