Arestado sa isinagawang entrapment operation ng Southern Police District ang isang lalaki at nakumpiskahan ng iligal na baril at granada sa kahabaan ng Biazon Road, Barangay Población, Muntinlupa City nito lamang Huwebes, Pebrero 20, 2025.
Kinilala ni Police Brigadier General Manuel J Abrugena, District Director ng Southern Police District, ang suspek na si alyas “Paul,” isang 32-anyos na lalaking e-bike driver at residente ng Barangay Baclaran, Parañaque City.
Pinangunahan ng District Special Operations Unit (DSOU) ng SPD ang operasyon kasama ang District Intelligence Division (DID), Intelligence Section, District Mobile Force Battalion (DMFB), at Muntinlupa City Police Station, na humantong sa pagkakahuli kay alyas Paul na sangkot sa pagbebenta ng mga iligal na armas.
Narekober mula sa suspek ang isang kalibre .45 pistol, isang kalibre .45 na magasin na kargado ng tatlong bala, isang hand grenade, isang genuine Php1,000 bill na ginamit bilang marked money, isang cellular phone, at isang sling bag.
Reklamong para sa paglabag sa Republic Act 10591 o “Comprehensive Firearms and Ammunition Regulation Act” at RA 9516 (Illegal Possession of Explosive) kaugnay ng RA 7166 at Comelec Resolution 11067 o Gun Ban ang inihain laban sa suspek.
Ang matagumpay na operasyong ito ay bahagi ng pinaigting na pagsisikap ng PNP na labanan ang mga loose firearms at maiwasan ang karahasan na may kaugnayan sa halalan at matiyak ang kaligtasan ng publiko.
Source: SPD PIO
Panulat ni PMSg Remelin M Gargantos
