Nasakote ang isang 33 anyos na lalaki na miyembro ng kilabot na Batang City Jail (BCJ) sa ikinasang anti-illegal drugs operation ng mga tauhan ng Manila Police District (MPD) sa kahabaan ng Isla Bungad, Isla Puting Bato, Barangay 20, Zone 2, Tondo, Manila nito lamang Lunes, Hulyo 1, 2024.
Kinilala ni Police Lieutenant Colonel Alvin Christopher Baybayan, Station Commander ng Delpan Police Station 12, ang suspek na si alyas “Boss”, residente ng Area A, Barangay 20, Zone 2, Parola Compound sa Tondo, Manila.
Nakumpiska kay alyas “Boss” ang tinatayang 105 gramo ng shabu na nagkakahalaga ng Php714,000, isang unit ng caliber 9mm Pistol, tatlong piraso ng caliber 9mm na bala, isang caliber 9mm magasin, isang granada at itim na sling bag at buy-bust money na ginamit sa transaksyon.
Inihahanda naman ang kaso para sa paglabag sa Republic Act 9165 o Comprehensive Dangerous Drugs Act of 2002, RA 10591 o Comprehensive Firearms and Ammunition Act at RA 9516 o Unlawful Possession of Explosives laban sa nasabing suspek.
Puspusan naman ang pakikipag-ugnayan ng Delpan Police Station sa mga barangay na kanilang nasasakupan kaugnay sa pagpapaigting ng presensya ng pulisya sa komunidad.
Source: Police Big Brother
Panulat ni PSSg Remelin M Gargantos
