Cebu – Timbog ang 35-anyos na freelance photographer matapos mahulihan ng nasa higit isang kilo ng hinihinalang shabu na may tinatayang halaga na Php7,140,000 sa drug-bust operation ng Lapu-Lapu City Police Office sa Puso Center, Brgy. Mactan, Lapu-Lapu City, Cebu noong Hulyo 7, 2023.
Ayon kay Police Colonel Elmer Lim, City Director ng Lapu-Lapu City Police Office, sa pagtutulungan ng City Intelligence Unit, City Drug Enforcement Unit, at Naval Forces Central ang High Value Individual na suspek na si “Rhoniel”, residente ng F. Jaca St., Tabok-Canal, Brgy. Pardo, Cebu City ay nadakip pasado alas-4 ng hapon sa naturang operasyon.
Maliban sa droga, nakuha rin dito ang isang belt bag, isang Nokia Cellphone, buy-bust money, at Php500 cash.
Nahaharap sa reklamong paglabag sa RA 9165 o ang Comprehensive Dangerous Drugs Act of 2002 ang suspek.
Patuloy naman sa pagpapaigting sa kanilang hakbangin ang kapulisan sa lungsod upang matiyak ang kaayusan, kaligtasan, at kapayapaan ng komunidad.
