Butuan City – Isinagawa ng Police Regional Office 13 ang FPJ’s Ang Probinsyano Basketball for a Cause na naganap sa Father Saturnino Urios University (FSUU) Gymnasium, Butuan City nito lamang Linggo, Nobyembre 6, 2022.
Ang aktibidad ay pinangunahan ni Police Brigadier General Pablo Labra II katuwang ang Command Group at Regional Staff ng PRO13.
Mainit na tinanggap ng manonood ang pagdating ng cast ng Ang Probinsyano na binubuo nina Jeric Raval, Marcos Alcaraz, Aljur Abrenica, Joko Diaz, Joross Gamboa, Mark “Big Mac” Andaya, Wendell Ramos, Diego Loyzaga kasama sina PBA superstar Arwind Santos at Miss Katya Santos.
Lubos ang naging saya ng mga nanood ng Basketball Game kung saan nanalo ang Artistahing Pulis ng Caraga laban sa cast ng Ang Probinsyano na may iskor na 124-115.
Naghandog din ng isang intermission number ang miyembro ng Kabataan Kontra Droga at Terorismo (KKDAT) na ipinakita ang kanilang talento sa pagsasayaw.
Samantala, ang naganap na friendly match ay isang fund-raising activity ng PRO13 na makikinabang ang mga adbokasiya ng kabataan lalo na ang mga miyembro ng KKDAT at mga nasa ilalim ng Recovery and Wellness Programs.
Patuloy naman ang pagpupursigi ng PRO13 na mapalakas ang ugnayan ng pulisya sa komunidad sa pagsasagawa ng aktibidad na magbibigay ng saya at inpirasyon sa bawat isa.
Panulat ni Patrolman Jhunel Cadapan/RPCADU13
