Pormal na inilunsad ng Philippine National Police (PNP) ang “The War for Truth: A Consultative Forum at ang Joint Anti-Fake News Action Committee (JAFNAC)” noong ika-2 ng Mayo 2025 sa PNP Multi-Purpose Center, Camp Crame, Quezon City.
Ang forum ay isa sa mga hakbangin ng pulisya at bahagi na rin ng direktiba ni Pangulong Ferdinand R. Marcos Jr. na mas paigtingin ang kampanya laban sa fake news.
Ito ay dinaluhan ng mga eksperto sa komunikasyon, cybercrime investigators, at mga miyembro ng media kasama sina Secretary Jay Ruiz ng Presidential Communications Office, Commodore Jay Tristan Tariela ng Philippine Coast Guard, beteranong mamamahayag na si Dave M. Veridiano, at Deputy Executive Director Mary Rose Magsaysay ng Cybercrime Investigation and Coordinating Center (CICC).
Samantala, inilunsad rin ng PNP ang kanilang binuong komite laban sa fake news na JAFNAC o Joint Anti-Fake News Committee na may layong sugpuin ang maling impormasyon na nagdudulot ng pinsala sa mga institusyon at kaligtasan ng bansa. Ang komite ay pinamumunuan ni PNP Deputy Chief for Operations, Police Lieutenant General Robert Rodriguez; Vice Chairperson PBGen Marvin Joe Saro; at mga pangunahing unit ng PNP tulad ng Anti-Cybercrime Group (ACG), Directorate for Operations, Directorate for Intelligence, Information Technology Management Service (ITMS), Office of the Chief PNP (OCPNP), Legal Service (LS), at Police Community Affairs and Development Group (PCADG).
Binigyang-diin ni PNP Chief, Police General Rommel Francisco Marbil ang kahalagahan ng pagtutok sa mga malinformation, disinformation, at misinformation na may malalim na epekto sa bansa kapag hindi ito nasugpo. Nilinaw din niya na ang inisyatiba ay hindi para labanan ang kalayaan sa pagpapahayag kundi ay para labanan ang maling impormasyon.
Bilang suporta sa JAFNAC, nanawagan ang Hepe sa lahat ng stakeholders na maging tagapagtanggol ng katotohanan at responsable sa komunikasyon.
“Ang laban na ito ay kailangan nating harapin—at pagtagumpayan—hindi gamit ang armas, kundi ang pagiging mapagmatyag, may pananagutan at pagkakaisa. Dahil sa pagtatanggol sa katotohanan, ipinaglalaban natin ang tama. Sa pagprotekta sa katotohanan, pinoprotektahan natin ang ating mga kababayan.”
“Ang laban na ito ay kailangan nating harapin—at pagtagumpayan—hindi gamit ang armas, kundi ang pagiging mapagmatyag, may pananagutan at pagkakaisa. Dahil sa pagtatanggol sa katotohanan, ipinaglalaban natin ang tama. Sa pagprotekta sa katotohanan, pinoprotektahan natin ang ating mga kababayan,” ani PGen Marbil.
Ang PNP ay patuloy sa pagsulong ng katotohanan at responsableng paggamit ng digital na teknolohiya para sa mas ligtas at mas maalam na bansa.
Panulat ni Tintin
