Nilooban ang isang Food hub at tinangay ang tinatayang Php320,000 cash ng tatlong armadong lalaki sa isang kilalang hotdog company sa Langihan Public Market, Barangay Holy Redeemer nito lamang Abril 02, 2024.
Kinumpirma ni Police Captain Moises Macalolot, hepe ng Butuan City Police Station 2, ang insidente kung saan ayon sa kanya, natangay ng mga bandido ang Php320,000 na pera.
Ayon sa inisyal na imbestigasyon ng pulisya, nagsasagawa ng auditing ang biktima na si Marvin A. Lumacang, 31 anyos, Senior Van Salesman ng Poseidon Seafood at residente ng P-5A Brgy. Bon-bon, Butuan City para sa kanilang araw-araw na benta, nang biglang dumating ang isa sa mga suspek na nakasuot ng itim na helmet at tinutukan ito ng armas saka nagdeklara ng pagnanakaw at agad na sumibat sa hindi pa tukoy na direksyon matapos kunin ang pera.
Patuloy naman na tinutunton ng pulisya ang mga saksi sa insidente kabilang na ang naka-install na CCTV camera sa pinangyarihang lugar upang matukoy ang mga suspek at maibalik ang pera ng biktima.
Siniguro naman ng CARAGA PNP na gagawin nila ang nararapat upang maresolba ang nangyaring pagnanakaw upang matiyak na mapapatupad ang pangunahing layunin ng bagong Hepe ng Pambansang Pulisya” na gusto ng pulis, LIGTAS ka”.
Panulat ni Karen A Mallillin
