Cebu City – Balik kulungan ang lalaking ex-convict matapos makumpiskahan ng nasa 100 gramo ng shabu na nagkakahalaga ng Php680,000 sa buy-bust operation na inilunsad ng City Intelligence Unit at City Drug Enforcement Unit ng Cebu City Police Office sa N. Bacalso St., Brgy. Mambaling, Cebu City, Lunes, Mayo 1, 2023.
Kinilala ni Police Colonel Ireneo Dalogdog, City Director ng CCPO, ang naaresto na si “Mac-Mac”, 33, residente ng Sitio Kaduloy, Brgy. Tisa, Cebu City at kabilang sa talaan ng High Value Individual.
Ayon kay PCol Dalogdog, pasado ala-1:00 ng hapon nang mailatag ng mga awtoridad ang operasyon na pinangunahan ni Police Lieutenant Lyndon Mondragon na humantong sa agarang pagkakaaresto ng suspek at pagkakasamsam ng naturang droga.
Nahaharap ang suspek sa kasong paglabag sa Sec. 5 at 11, Art. II ng RA 9165.
Ang matagumpay na operasyon ay patunay lamang sa mahusay na pagpapaigting at maayos na pagpapatupad ng kapulisan ng lungsod at ng buong rehiyon sa kampanya kontra ilegal na droga.
