Cebu – Balik kulungan ang isang ex-convict at ang kasamahan nito matapos makumpiskahan ng nasa 200 gramo ng shabu na nagkakahalaga ng Php1,360,000 sa buy-bust operation ng mga operatiba ng Minglanilla Municipal Police Station at Regional Intelligence Unit 7 sa Siito Abuno, Brgy Tunghaan, Minglanilla, Cebu nitong Miyerkules, Marso 29, 2023.
Ayon sa Chief of Police ng Minglanilla MPS, Police Major Arieza Otida, ang ex-convict ay kinilalang si “Bonar”, 41, High Value Individual, residente ng Brgy. San Roque, Talisay City, Cebu at ang kasama nitong si “Antik”, 30, residente ng Brgy. Cadulawan, Minglanilla, Cebu ay nadakip dakong 1:10 ng madaling araw matapos mahuli sa akto sa pagbebenta ng hinihinalang shabu sa isang poseur buyer.
Narekober din mula sa mga naaresto ang isang sling bag na ginamit bilang lagayan ng droga at buy-bust money.
Kasong paglabag sa section 5 at 11 ng Republic Act 9165 o Comprehensive Dangerous Drugs Act of 2002 ang kakaharapin ng dalawang arestadong suspek.
Kaugnay dito, pinuri ni Police Brigadier General Anthony A Aberin, Regional Director ng PRO 7, ang mga operatiba sa likod ng matagumpay na operasyon at tiniyak ang patuloy na pagpapahusay at pagpapaigting ng kampanya kontra ilegal na droga para sa tuluyang pagkalipon nito.
“The efforts of our police put into this operation on illegal drugs have no limits. We will tirelessly work together to accomplish more and eradicate illegal drugs in our region”, ani PBGen Aberin.
