Ipinag-utos ni Philippine National Police (PNP) Chief, Police General Guillermo Lorenzo T. Eleazar sa Internal Affairs Service (IAS) na magsagawa ng summary dismissal proceedings laban sa pulis na sangkot sa kasong kidnapping sa Manila.
Naaresto si Patrolman Wilfredo Mindanao ng Police Security Protection Group, kasama ang hinihinalang kasabwat nito na si Romeo Aday, dahil sa di umano’y pagdukot sa isang lalaki na anila ay nahulihan ng iligal na droga.
Nagpanggap umanong ahente ng National Bureau of Investigation (NBI) si Aday at inaresto ang biktima dahil sa pagdadala ng hinihinalang shabu.
Batay sa report, ikinulong ng suspek ang biktima sa tinutuluyan ni Mindanao sa Paco, Manila at humingi ng Php50,000 mula sa biktima kapalit ng paglaya nito.
Matapos makatanggap ng reklamo mula sa nagtitindang nakasaksi sa pagdukot, agad rumesponde ang mga tauhan ng Paz Police Community Precinct PS 5-Manila Police District at natunton ang mga suspek na iligal na ikinulong ang biktima.
Narekober sa lugar ang isang (1) sachet ng hinihinalang shabu at tatlong (3) cellphone.
“We cannot allow these few rogues in the service to destroy the public’s confidence on the PNP now that we have made strides in regaining our kababayan’s trust. I am warning those policemen who will continue to undermine our mandate and erode the institution, you will be caught and made to face the consequences of your wrongful actions,” giit ni PGen Eleazar.
Photo Courtesy: RMN Networks
#####
Panulat ni: Police Corporal Josephine T Blanche
