Samar – Sinalakay ng mga operatiba ng PNP at PDEA 8 ang isang drug den na nagresulta sa pagkakaaresto ng walong indibidwal sa Brgy. 10, Catbalogan City, Samar nitong ika-13 ng Nobyembre 2023.
Kinilala ang mga suspek na sina Joy, 45 anyos (Drug den maintainer); Leonido, 25 anyos (visitor); Criselda, 36 anyos (visitor); Pio, 22 anyos (visitor); Angelica, 27 anyos (visitor); Gilbert, 23 anyos (visitor); Anna, 20 anyos (visitor); at Manuel, 24 anyos (visitor), at pawang mga residente ng Catbalogan City, Samar.
Bandang 6:05 ng gabi nang isinagawa ang operasyon ng pinagsanib na pwersa ng mga operatiba ng Catbalogan City Police Station-SDET sa pangunguna ni Police Major Niño T Cabañas, Intel Officer; PDEA-Samar Provincial Office; at PIU/PDEU, SPPO at sa koordinasyon sa PDEA Regional Office 8.
Nakumpiska mula sa mga suspek ang dalawang pirasong sachet ng hinihinalang shabu na tumitimbang ng humigit kumulang 11.81 gramo na may tinatayang market value na Php94,480 at iba pang drug paraphernalia.
Mahaharap ang mga suspek sa kasong paglabag sa Sections 5 at 11, Article II ng RA 9165 o Comprehensive Dangerous Drugs Act of 2002.
Dahil sa serbisyong nagkakaisa ng Samar PNP at PDEA 8, tinitiyak nito sa publiko na patuloy ang kanilang Anti-Illegal Drugs Operation sa pagsugpo sa aktibidad ng ilegal na droga sa kanilang nasasakupan tungo sa mas ligtas at maayos na pamayanan.
